آنکھ میں دھوپ کا موسم تھا
 دل نگری میں رات سمے
راکھ تھی جلتے پھولوں کی
اور سرد نظر میں آنسو جمے
 کسے بتائیں اندرکے شور میں
 کیسے کیسے لفظ گمے
 مڑ کر دیکھا بات نہ کی
 مگر چلتے چلتے قدم تھمے
پہنچ گئے ہیں صدیوں تک
گرتے پڑتے چلتے لمحے
 تعبیروں کی کھوج میں ہیں
جاگتی آنکھیں خواب سہمے

عزمِ نو

ہم نئے زمانے کے مصور
اب اپنے موقلم سے
خود اپنی صورت سنوار لیں گے
ہم نئے زمانے کے ہنر کار
خود پر برستے ہر سنگ سے
خود اپنی مورت تراش لیں گے
ہم بے چہرگی کے ہر اک غم سے لڑیں گے
ہم رائیگاں نہیں مریں گے